கிச்சன் டாக்டர்

அடுப்பங்கரையிலும் வீட்டைச் சுற்றியும் இருந்த இயற்கை உணவுப் பொருள்களால், நோய் வராமலும் வந்த நோய்க்கு தீர்வும் கண்ட காலம் இப்போது இல்லை. எல்லாம் செயற்கைமயம் ஆகிவிட்ட இந்தக் காலத்தில் உணவுகளிலும் செயற்கைப் பொருள்கள் ஆக்கிரமித்துவிட்டன. பன்னாட்டு உணவுகள் இன்று தமிழ்நாட்டின் குக்கிராமங்களில்கூட உலா வருகின்றன. இன்றைய தலைமுறை அந்த உணவுகளை சாப்பிட்டு மருத்துவ மனைகளுக்குச் செல்ல வேண்டிய பரிதாப நிலைதான் ஏற்பட்டிருக்கிறது. வெயில் காலத்தில் ஏற்படும் உபாதைகளைத் தடுக்க பானகம், பழைய கஞ்சி எனும் நீராகாரங்கள், குளிர் காலத்தில் வரும் நோய்களைத் தடுக்க மிளகு, சுக்கு போன்ற உணவுப் பொருள்களால் தயாரிக்கப்படும் கஷாயங்கள்... என அந்தந்தப் பருவத்தில் தமக்கு வரும் நோய்களை முன்கூட்டியே தடுத்தாட்கொண்டனர் நம் முன்னோர். அப்படிப்பட்ட நம் பாரம்பர்ய உணவுப் பொருள்களால் நோய்கள் வருமுன் காப்பது எப்படி, வந்த நோயை விரட்டுவதற்கு உதவும் உணவுப் பொருள்கள் என்னென்ன, அவற்றைக் கொண்டு தயாரிக்கப்படும் உணவுகள் என நம் பாரம்பர்ய உணவுப் பொருள்களின் பெருமையையும் அருமையையும் விளக்குகிறது இந்த நூல். இனி, நோயின்றி நலம்வாழ உதவும் உணவுப் பொருள்களைப் பற்றி அறிந்துகொள்ளுங்கள்.